Act 13 | WNU | STEP | Ginam Antiok end Yisast oabig igour eng qei Qenu qob gigi wurinob qamara dibes qamb ne qei Yisas yurau eng wuriimbig ende at igurei. Munon eng at igour eng unum ger Barnabas, ne goan qurun ger unum Simeon, ne Sairini munon ger Lusius, ne Manain, wo wayit igama Herot ur unor qoat igour eng ne ger Sol ende.

Acts 13

13:1-3 Barnabas Sol nob wuriimuriamirei

1 Ginam Antiok end Yisast oabig igour eng qei Qenu qob gigi wurinob qamara dibes qamb ne qei Yisas yurau eng wuriimbig ende at igurei. Munon eng at igour eng unum ger Barnabas, ne goan qurun ger unum Simeon, ne Sairini munon ger Lusius, ne Manain, wo wayit igama Herot ur unor qoat igour eng ne ger Sol ende. 2 Qen end mi niau gitab ne Qenu wot qamb igamari Qenu Igomurur qau wurinob qamar: “An Barnabas Sol nob wagari ye sarau ger abar qamb wurit maribigom eng obounor,” qamarei. 3 Ende at ne bo mi gitab Qenu qob qamb igo ne wuriimurimune sarau end isar qamb wuri nonogursi uben wuri tari erer end big wogub wuriimurimari Barnabas Sol nob ombur qoamirei.

13:4-12 Barnabas Sol nob Saiprus end qob uber dibes qamamirei

4 Isubari Igomurur qau wonou sarau wurit maribigor end isub qamb ne Yon Mak mot nob isi Selusia qumo der tabin ba ai qaur Saiprus end iramirei. 5 Irab isi ginam aib Salamis end isub Yuda munon qei end igour wurinou Qenut igub igour munai mor end isub Qenu qob wurinob qamb igurei.

6 Ai qaur end ir igo ne ginam gugum isub qib qob qamb isi yarab ne ginam aib ger Papos end is gamir eng Yuda munon ger unum Baryisas, munon eng munon wuridumimau tari, wo der munon qei wurimurimar ete wurinob qamb igoai: “Qenu qob apand yenob qamara quraum,” ende qamb igoai. 7 Munon eng wonou munon banam ger unum Sergius Paulus, wo munon ai qaurt eng igour eng ibag igoai. Wo qoyam aib end Barnabas Sol nob Qenu qob qamarari igib qamb wurit arei. 8 Ende wurit ara ne Baryisas Grik qobut Elimas qamb igour eng wo der wonou munon banam Sergius Paulus eng wo Yisas qob nob qamarari oabiginer qamb wo taisiarei. (Baryisas eng wo Yisas qob me qenunget igamau end.) 9 Ende aba ne Sol unum ger qeniamir eng Pol, wo Qenu Igomurur qau wot isa ne Elimas nan gab nob qamar: 10 “Ne aibigau misir neba songesiamir end qomon uber ba songesi qobub igoan. Ne munon wuriimurimarau tari, Qenu qob apand eng igama ne qoas-qoas qamb qib igoan. 11 Eng at qib igoan end ne see qas Qenu nesiera mag tuumburiba, qen mai-mai qiyo isa bo asiemban.” Ende nob qamara qen end qas mag waber-waber bura gab ebeter ego mom tuum bura munon wuribeib qamb uben arir qib igoai. 12 Gabman munon aib eng Pol Barnabas nob ende abari ibag qesi wara igo ne Munon Aib qob igub Yisast mom oau apand burerei.

13:13-52 Barnabas Sol nob Pisidia munon ginam aib Antiok end qob wurinob qamamirei

13 Ende aba wogub Pol munon ombur eng Barnabas, Yon Mak wurinob ginam Papos eng wogub tabin ba bo ai ger Pampilia end isub ne isi ginam aib Perga end isub ne Mak end wuriwogub Yerusalem qite diarei. 14 Mak wuriwogub iroa Pol Barnabas nob ginam eng wogub bo ai Pisidia end diab is ginam aib Antiok ger end igo ne Yuda wurinou qen gitab igour eng Sabat qamb igour eng gab ne Pol Barnabas nob Qenu wot igau munai mor end isub wurinob bugab igurei. 15 End is bogomari ne munon qei der Qenu qomon Moses nob qamara gumater eng wanunger ne Qenu wonou qob gigit qamara munon gumatemir eng wanunger ende abari igub igurei. Qob eng ende wanungermari wogub munon baraitari munai eng qoat igour eng der munon ombur eng wurinob qamamir: “Ne an ombur bo qob ger igama gab eng qamarari in bo igub,” ende qamamirei.

16 Qamarari Pol der qamar: “An Yuda munon nob munon ar qei nob Qenut igub igoumon eng ye qemerine igar,” qamar. 17 “In Yuda ininou Qenu eng tonoan wurimaribiga toat igurei. End ne qoan ai Isip umo igamari wonou aba munon yurau aib der isumirei. Ende aba ne munon ginam qenen der wuriborusi sumungasi igamari Qenu wonou oromar igoai. 18 Ne wuri ai Isip mom wogub ai munon ue ar end qib igamari togun 40-ende umor eng Qenu oromar qib igoai. 19 Ende qib-qibi diab ai aib ger baumir eng Kenan. Ginam end munon yurau 7-ende end igamari. Qenu wonou munon yurau wurinonogursia ginam di ne munon yurau eng orotoar arir wogub munai eng baumirei. 20 Baub end igamari togun 450-ende wara wogub ne Qenu wonou munon qei wurimaribiga wuri der gigit oroar igurei. Ende at isi yarab mom sindomund maribigor eng unum Samuel.

21 Samuel ende igama ne Yuda wuri der Qenu King ger bo wurit maribiginer qamb at igamari ne Benyamin yurau end ger maribigatarer eng unum Sol ur unum Kis. Eng bo togun 40-ende bo oroar igoai. 22 Sol ende igama ne Qenu wo wogub bo Debit maribig ne wot qamar: “Yesi wonou wau Debit eng wo yonou oau uri eng gab ne King igoar qamb mari bigetroum eng. Munon eng wo ye mi eb qamb nob qemerin eng qob igub ende ebeiba,” qamar. 23 Ende qamb qamar: “Debit wau misinam der isiner tumbigi qir end munon baraitari aib darimba. Dari ne Isrel munon yamangar wuri musieriba qamar eng unum eng Yisas,” qamar.

24 Ne bo qamar: “Qoan Yisas deriner end Yon munon wurimaragansiau eng Isrel wurinob ende qamara wuri oabigari wurimaragansi igoar eng. 25 Ende at ne Yon wonou sarau eng ugeib qamb birisi wurinob qamar: “An yet mai yet quroumon? Ye munon qoan deriba qamarari an qenen qoat igoumon eng ye eng ue, qamar. Wo eng se qanam yariba. Yariner eng ye sarau ebine gaumon gas ende ue, wo yetanami wonou wesi ar ebeibaba.”

26 Pol ende qamb qamar: “An munon yurau ar qei eng nob in Abraham yurau tumbigi nob erogori Qenu qob ininob qamara igub igoun e. End ne in gugum erogori Yisas inubersi qamb init imurimb qamar eng. 27 Eng imurima dara ne in munon yurau aib Yerusalem igour eng qob qoan gumatemir eng qas inorou qent wanunger igour eng Yisas sir me imbigau. Qob qoan gumatemir eng gor munon eng dara sumungasiorubour end taut ebetemir eng wuri me imbigau. Yisas mindigar qob ger wot igo qamb gunor ego ue gab Pailat uyes waramari uminer qamamirei. 29 Qob eng qoan ende igoar end ne Yisas nam tenori big waramari uma wogub munon ombur-ombur bo beneri ba (wurinou qomon eng) nomon iru ger qoan igoar end tumuniamirei. 30 Tumuniamirei igama Qenu bo meniamorei. 31 Menima der bugab ne wonou imbigau yurau eng qenen wurit dibentra gab ne yurau eng wuri der Galili qamb, ne Yerusalem qamb eng isub qob suab qib igour eng.

32 Eng imusi isi yarab ne in gor mi nasim eng ebeter eng aninob quraun eng. Qob eng qoan Qenu ininou tonoan wurinob qamara gumatemir eng git bais misuu nami ende igoai, igoar eng see mom diban ibirigeserma gaun eng, end ne Yisas der bugamor eng. Qoan Isrel wurinou uru warau wepep goan (“Sam” qamb igour) qen yabt gumatemir eng ete igoai:

Ne yonou wau ten, ye nonou tain
ende igoai. Eng Qenu qoan munon ger nob qamara gumater eng ete:

Qoan Ye Debit nob qamam end anubersi annonogursi ne an me anweginei.
34 End ne Qenu Yisas menima der bugamor eng me bierau. 35 Ne Debit uru wab igour ger gumater eng ete:

Nonou munon oau uri eng gab boru bur qamb me weginenei.
ende.

36 Ininou tonoan Debit wo Qenu sarau betet ende at igoi uma ininou tonoan qei wuri tumuniamirt end tumunimari biet isorei. 37 Ne Qenu wo Yisas meniamor eng bo sabar umb me bierinerei. 38 Eng gab ne see aninob quraum eng: In Yuda qomon qoan Moses gumater eng apand qamb toat igorunon eng aninou qomon boru-boru mogirt wab me wugunanei. A Yisast oabigunon eng aninou qomon boru-boru mogirt wab wagari wo anmusia uberet ne qenen bebereg igoruboumon.” 40 Pol ende qamb qamar: “Qenu qob ger qoan qamara gumatemir eng ete.

Ye anit mi wes uber ar oboum eng munon qei animbigari an maigas me oabigunanei. Eng an yonou qob omboarir igamari ansieri ne borusi qiet ne mom umb uburuboumon. Qob eng anit irimaniminer qamb an gugum Yisast oabig igoarar,”
ende wuri irun wab qamarei.

42 Pol Barnabas nob qob eng ende wurinob qamb wogub inorou munai aib eng wogub qoaubari wuri der wurinob qamamir: “An qibi qen geret init igub gab eng bo yar qob quraumon eng bo qamarari igun.” Ende qamb wogub qei bunumban qoari wogub ne munon Yuda yurau eng ne munon yurau ar qei der Pol Barnabas nob orotoar qiroari ombur ete wurinob qamb qib igurei: “An Qenu mi aib init siar e gaumon end ne mom qenen end mom misir igub igoarar,” qamamir.

44 Inorou qen ger end munon ginam qenen gugum yar qiumuni Qenu qob igub qamb yaremirei. 45 Munon irou Pol qob igotoub qamb yarari ne munon baraitari qei der Pol merimotet ne mindigar qob wot qamb igurei. 46 Ende abari igub Pol Barnabas nob ombur der qamamir: “Qenu qob e an Yuda qobtari igari ne munon yurau ar qanamt igunor qamb Qenu ebeter ego aninou der merimot me igun qamb ebet qenen bebereg igamau qob eng siningot igoumon eng. Ende abari animbag in irigai iningara gab in see anwogub munon ginam ar qei end isuboun,” qamar. 47 Qamb qamar:

Qenu wonou qob ger Yisast qamar eng ete: Ye ne munon Yuda yurau ue eng wurinou urut begen gas ende nemaribigom end munon ai qent gugum bebereg igamau ai tap eng imbigubour, ende qamar end in anwogub munon Yuda ue eng wurit isub qob uber eng wurinob qomoruboun.
48 Ende qamarari munon ar eng der qob eng igub borusi mom mismisir qamamir: “Munon Aib qob eng qamar eng sig uber.” Ende qamb wogub munon qei Qenu bebereg igoarar qamb maribigor eng Yisast oabigumirei. 49 Ende at ne munon ginam pi-pi eng Qenu qob iruges big igub igurei. 50 Ne Yuda munon qei der ginam qenen munon baraitari qei ne yamangar aib qei Yuda qomon toat igour eng wurinob qamarari Pol Barnabas nob orotoar ariramari ne ginam eng wogub Aikoniam end isumirei. Isub qamb ombur irumban gotent igoar eng porongot ariramirei. Eng etemir eng ete qamb wuri qob uber siningot igour eng Pol Barnabas nob wuri qob ger ue, munon wurinou qas, ende qamb. 52 Ne munon ginam Antiok igour eng Yisast oabig mismisir igamari ne Qenu Igomurur qau wurit isub wurinonogursia igurei.